شعر رمضان البريكي& صيورها) صيورها تمطر ايجيك اشبوبها .. ياصاحب دوام الحال م الموحال

Ramadan Elbriki

١٠ نوفمبر ٢٠١٥

 كتب الشاعر رمضان البريكي 

صيورها

 صيورها تمطر ايجيك اشبوبها ..

 ياصاحب دوام الحال م الموحال .. 

منذ عامين..هكذا كتبت 

وشرفني الشعراء المبدعون بالتفاعل.

صيورها تمطر ايجيك اشبوبها .. ياصاحب دوام الحال م الموحال

وصيورها تفتح معاك ادروبها .. الحال ايتبدل ما ايدوم بحال

وصيورها تلبس الزاهي ثوبها .. وتعطيك من حلاوتها زهاوة بال

وصيورها ترفع معاك اهذوبها .. وتعطف العين اللي جفاها طال

وصيورها تقرب ويرسم صوبها .. و تحط الرحيل و تهجر الترحال

وصيورها يسهل عليك اركوبها .. وما اتروم غيرك م العرب خيال

رمضان البريكي

10 نوفمبر 2015

مشاركة الشاعر 

عبدالسلام بالحاج

وصيور فجرها يقشع ظلام غروبها ... واحجوب شمسها واعر على الغربال

وصيورهن كدرها وحزنها واكروبها ...يبقن من الماضي قصص وامعال

وصيور من سقاها سم في مشروبها ... افواد فم كبده ناكلوه اوكال

بيت آخر من إضافة

 أ. عيسى عبدالقيوم

وصيورها تنحل كل كروبها .. للعقل جولة موش دوم هبال

مشاركة عثمان سالم 

وصيورها ترطاب كل اقلوبها.. وتنظر زهاها كان عمرك طال

وصيورها يعقد عسل مكتوبها .. ويرجع اللاجئ ما ادوم احوال

وصيورها تنفض وسخ من ثوبها .. وتمسح الدمعة من اعيون أطفال

مشاركة

 الشاعر امير ابوغرارة

قريت خاطره واعجبت بيه اسلوبها .. حسيتها فوق الخيال خيال

جميله اتقول غزال جت في روبها .. تهايت تمنيته المقعد طال

توارت ونا مازلت ودي صوبها .. وديمه وراها ف الخلا جوال

زادها ولد بالحاج ريح هبوبها .. نسمه ربيع مصادفه شلال

( وعثمان ) ساقي سدرها في كوبها .. عسل صدر صافي متعه الوكال

لقيتها علي الغافل صعيب اقروبها .. ساهله وممتنعه علي القوال

يا بال كيفي في مجال دروبها .. واعر عليه القول كانه قال

دار عازه ع اللي سكنها طوبها .. باكي وما زالت علي الاطلال

يا بن ابريك عليك شانت دوبها .. واحنا من زمان اتزيدنا ف هوال

صبرنا و زدنا الصبر و نجازوبها .. وندعوا المولي ايعدل المكيال

مشاركة 

الأستاذ إبراهيم بوشناف 

Ibrahem Bushnaf

وصيور السفيه ايطيح من مركوبها .. ويركب اللي فارس ونسل أرجال

وصيورها ريح الخمود أهبوبها .. اتكاصي اللي علوا ضنا لأنذال

الدنيا قديمة فرحها وكروبها .. ماعمر دامت لا تمكن حال

مشاركةعبدالسلام إبراهيم

Abdsalam Ibrahem

صيورها تعرف اللي كادولها .... وتعرف المفتي وتعرف الدجال...

وصيورنا في يوم بنمشولها ... وتستقبلنا كما تستقبل الأبطال. ..

وصيورنا في يوم بنحكولها ... عن شئ ما يخطر ابد عالبال...

ونبدوا باسم الله ونقوللها ... ياليبيا شلقم دموعه هال ...

وياليبيا باعك وجت باسطولها ... والدم لترابك ارخص وسال...

مشاركة شقيقي العزيز الشاعر الفضيل البريكي :

صيورها ياخوي يورق عودها .. ننسو سنين معجرفات كلال

يجينا الفجر و مايطول غروبها .. ينزاح لون اسود تقول كحال

لافوق يشاكع لميع بروقها .. وصوت رعدها سبحان ذو الجلال

يجود السحاب بمزنها وشبوبها .. لين واديها. يقولو سال

يطوح عذاويه نضاف دروبها .. يفيض منهلها. عفا و. زلال

يروا الصيام غوطها وحلوقها .. تخضار تزها و الجدب ينشال

يسهل الله يزيح هم كروبها .. ويفتح أبواب مسكره بقفال

تجيبو هناها ومجدها مطلوبها ..أنت و رفيقك كي اولاد هلال

مشاركة : وسام دغمان

سيورها تصفاء بعد تعكيرها ... صحيح ليبيا تبي اليوم أرجال

وسيورها تعطر يفوح عبيرها ... غير يخطوها ليبيا الاندال

الاوجاع مازلت قوي تسطيرها ... وقلوبنا مش صافية مازال

غير خيركم للبلاد كاتر خيرها... توا تندمو مايفيد بكرة مال

مشاركة الأستاذ عمار ألطيف

سيورها تخضار تزهى دروبها

وسيورها ايجوها تريس عقال

وسيورها تغني غناوي صوبها

وسيورها تكسر عصى الذلال

وسيورها تهدى بعد غيبوبها

وسيورها اتحطم حديد الاغلال

وسيورها اتجدد وتلبس ثوبها

وسيورها تاكل طعام حلال